नाटे सागरी पोलिसांची जलद आणि प्रभावी कामगिरी — अवघ्या १२ तासांत शिसे चोरी उघडकीस, दोन आरोपी ताब्यात, ₹१.४७ लाखांचा मुद्देमाल हस्तगत

सहाय्यक पोलीस निरीक्षक प्रमोद वाघ यांच्या नेतृत्वाखालील तपास पथकाचे उल्लेखनीय यश

रत्नागिरी / प्रतिनिधी - अनिकेत मेस्त्री

सागरी पोलीस ठाणे नाटे यांनी पुन्हा एकदा आपली दक्षता आणि तपासकौशल्य सिद्ध करत अवघ्या १२ तासांच्या आत तब्बल ₹१,४७,२००/- किमतीचे ४६० किलो वजनाचे शिसे हस्तगत केले असून, या चोरीत सहभागी असलेले दोन संशयित आरोपी ताब्यात घेतले आहेत. या कारवाईमुळे किनारी भागात अलीकडे वाढलेल्या चोरीच्या घटनांवर आळा बसणार आहे.
पोलिसांकडून मिळालेल्या माहितीनुसार सागरी पोलीस ठाणे नाटे येथे गुन्हा रजि. क्र. ७४/२०२५, भारतीय न्याय संहिता कलम ३०३(२) अंतर्गत गुन्हा दाखल करण्यात आला आहे. हा गुन्हा मौजे कातळी सडा, ता. राजापूर, जि. रत्नागिरी येथे घडला.
फिर्यादी नासिर इसहाक मजगावकर (वय ४७, रा. कातळी) यांनी तक्रार दिली की, चंद्रशेखर रजनिकांत कुश्ये (रा. मेढा, ता. मालवण) यांच्या मालकीचे पर्सनेट मच्छिमारी जाळे त्यांनी दुरुस्तीसाठी आणून कातळी सडा येथील शब्बीर नाखेरकर यांच्या कंपाऊंडमध्ये काळ्या ताडपत्रीने झाकून ठेवले होते.

तथापि, दिनांक १६ सप्टेंबर २०२५ रोजी त्यांनी तपासणी केली असता जाळ्यातील सुमारे ६४० किलो वजनाचे शिसे चोरीस गेलेले आढळले. त्यानंतर त्यांनी सागरी पोलीस ठाणे नाटे येथे तक्रार नोंदवली.
तक्रार प्राप्त होताच सहाय्यक पोलीस निरीक्षक प्रमोद वाघ यांच्या मार्गदर्शनाखाली विशेष तपास पथक तयार करण्यात आले. तपासादरम्यान तांत्रिक साधनांचा वापर आणि गोपनीय बातमीदारांच्या माहितीच्या आधारे संशयितांचा शोध घेण्यात आला.
केवळ १२ तासांच्या तपासानंतर पोलिसांनी खालील दोघांना ताब्यात घेतले
१) मुबिन अब्दुल सत्तार सोलकर (वय ३०, रा. धालवली मुस्लिमवाडी, ता. देवगड, जि. सिंधुदुर्ग)
२) समिर कुदबुद्दिन सोलकर (रा. कातळी, ता. राजापूर, जि. रत्नागिरी)
सखोल चौकशीत दोघांनी गुन्हा केल्याची कबुली दिली, त्यानंतर त्यांच्या ताब्यातून तब्बल ₹१,४७,२००/- किमतीचे (४६० किलो वजनाचे) पर्सनेट मच्छिमारी जाळ्याचे शिसे जप्त करण्यात आले. (दर प्रति किलो ₹२३०/- प्रमाणे)
सहाय्यक पोलीस निरीक्षक प्रमोद वाघ यांनी यापूर्वी क्राईम ब्रँच रत्नागिरी शाखेत पोलीस निरीक्षक नितीन ढेरे यांच्या मार्गदर्शनाखाली काम केलेले असून, त्या काळात मिळवलेला गुन्हेगारी तपासाचा अनुभव व तांत्रिक माहितीचा सखोल वापर त्यांनी या प्रकरणात प्रभावीपणे केला.
त्यांच्या कुशल तपासकौशल्यामुळे आणि योग्य दिशेने मार्गदर्शनामुळे हा गुन्हा अवघ्या १२ तासांत उघडकीस आला.
ही कारवाई मा. पोलीस अधीक्षक श्री. नितीन बगाडे, मा. अप्पर पोलीस अधीक्षक बी. बी. महामुनी, मा. उपविभागीय पोलीस अधिकारी सुरेश कदम, तसेच पोलीस निरीक्षक नितीन ढेरे (स्था. गु.शा. रत्नागिरी) यांच्या थेट मार्गदर्शनाखाली पार पडली.
तपास पथकात श्रेणी पोलीस उपनिरीक्षक संजय झगडे, पो.कॉ. पाटील (क्र. ४१०), पो.कॉ. जाधव (क्र. १३५९), पो.कॉ. कुसाळे (क्र. ३३४) व पो.कॉ. बांदकर (क्र. १५७८) यांनी सक्रिय सहभाग नोंदवला.
सदर दोन्ही आरोपींना अटक करण्यात आली असून, पुढील तपास श्रेणी पोलीस उपनिरीक्षक संजय झगडे हे करीत आहेत.
किनारी भागातील मच्छिमार व नागरिकांनी सागरी पोलीस ठाण्याच्या या जलद कारवाईचे मनापासून कौतुक केले आहे. चोरीस गेलेला मुद्देमाल पूर्णपणे हस्तगत झाल्यामुळे मच्छिमार समुदायात दिलासा पसरला असून पोलिसांवरील जनतेचा विश्वास अधिक दृढ होण्यास मदत होणार आहे.