क्रांतिसिंह नाना पाटील जिल्हा रुग्णालयात स्थायी पोलीस चौकी स्थापन करण्याची संभाजी ब्रिगेडची मागणी

सातारा : क्रांतिसिंह नाना पाटील जिल्हा रुग्णालय (सिव्हिल हॉस्पिटल) येथे वाढत्या गर्दीमुळे रुग्ण, त्यांचे नातेवाईक आणि आरोग्य सेवकांच्या सुरक्षेचा प्रश्न गंभीर होत चालला आहे. या पार्श्वभूमीवर हॉस्पिटल परिसरा स्थायी पोलीस चौकी स्थापन करण्याची मागणी संभाजी ब्रिगेडतर्फे करण्यात आली आहे.

जिल्ह्यातील सर्वात मोठे शासकीय रुग्णालय असलेल्या सिव्हिल हॉस्पिटलमध्ये दररोज हजारो रुग्ण उपचारासाठी येतात. विशेषतः आपत्कालीन विभागात रुग्णसंख्या मोठ्या प्रमाणात वाढत आहे. यामुळे रुग्णालय परिसरात वाद-विवाद, मारामाऱ्या, डॉक्टर व कर्मचारी यांच्यावर हल्ले, तसेच बाहेरील गुन्हेगारी प्रवृत्तीच्या लोकांच्या वादामुळे असुरक्षित वातावरण निर्माण झाले आहे. अनेकदा उपचारास होणारा विलंब, रुग्णवाहिकेतील उशीर आणि गोंधळामुळे रुग्ण तसेच त्यांच्या नातेवाईकांमध्ये भीतीचे वातावरण आहे.

या परिस्थितीत रुग्णालय परिसरात स्थायी पोलीस चौकी स्थापन केल्यास आपत्कालीन प्रसंगी तत्काळ कारवाई होऊन शिस्त व सुरक्षितता राखली जाईल, असे निवेदन संभाजी ब्रिगेडतर्फे जिल्हा पोलीस अधीक्षकांना देण्यात आले.

या वेळी संभाजी ब्रिगेडचे जिल्हा अध्यक्ष रफिक शेख, जिल्हा उपाध्यक्ष अॅड. दशरथ निकम, जिल्हा संघटक महेश गराटे, जिल्हा सचिव महेबूब पठाण, तालुका अध्यक्ष सत्यवान मोरे, सातारा सोशल मीडिया अध्यक्ष संकेत भोईटे, सातारा शहराध्यक्ष अमोल नलावडे, आशिष खवळे, इम्रान कच्ची, नाजीम बागवान आदी पदाधिकारी उपस्थित होते.