మందమర్రిలో అతలాకుతలమైన జనజీవనం: భారీ వర్షాలకు పొంగిపొర్లిన వాగులు, లోతట్టు ప్రాంతాలు జలమయం

పవర్ తెలుగు దినపత్రిక:12-09-2025-మందమర్రి,: నిన్న రాత్రి నుంచి మంచిర్యాల జిల్లాలోని మందమర్రి మండలంలో కురుస్తున్న ఎడతెరిపిలేని భారీ వర్షాల కారణంగా జనజీవనం పూర్తిగా స్తంభించిపోయింది. లోతట్టు ప్రాంతాలు జలమయం కాగా వాగులు వంకలు ఉధృతంగా ప్రవహిస్తున్నాయి. ముఖ్యంగా తుర్కపల్లి గ్రామం విద్యానగర్ ప్రాంతాలు తీవ్రంగా ప్రభావితమయ్యాయి.మందమర్రి మండలం తుర్కపల్లి గ్రామం ఉన్న వాగు పొంగిపొర్లడంతో గ్రామానికి బయటి ప్రపంచంతో సంబంధాలు తెగిపోయాయి. వరదనీరు రహదారులపై ప్రవహించడంతో రాకపోకలు పూర్తిగా నిలిచిపోయాయి దీంతో నిత్య అవసరాల కోసం బయటకు వెళ్లాల్సిన ప్రజలు తీవ్ర ఇబ్బందులు పడుతున్నారు. విద్యానగర్‌లో:జలదిగ్బంధం మందమర్రిలోని విద్యానగర్ ప్రాంతం జలదిగ్బంధంలో చిక్కుకుంది. ముఖ్యంగా చిత్లాపూర్ నుంచి వచ్చి ఇక్కడ నివాసం ఉంటున్న కుటుంబాలు తీవ్రంగా నష్టపోయాయి వారి ఇళ్లలోకి వరదనీరు ప్రవేశించడంతో వంట సామాగ్రి, దుస్తులు, పత్రాలు వంటి కీలక వస్తువులు తడిసి ముద్దయ్యాయి. ఎన్నో కుటుంబాలు కనీసం తలదాచుకునేందుకు చోటు లేక నిరాశ్రయులయ్యాయి.రాత్రంతా వరదనీటి మధ్య జాగారం చేయాల్సి రావడంతో వారు మానసికంగా శారీరకంగా అలసిపోయారు.ట్రాఫిక్‌కు తీవ్ర అంతరాయం:మందమర్రి ప్రధాన రహదారిపై వరదనీరు చేరడంతో ట్రాఫిక్ పూర్తిగా నిలిచిపోయింది. వాహనాలు ఎక్కడికక్కడ నిలిచిపోవడంతో ప్రజలు గమ్యస్థానాలకు చేరుకోలేకపోయారు. ముఖ్యంగా అత్యవసర పనుల మీద వెళ్లినవారు, ఉద్యోగులు, విద్యార్థులు తీవ్ర ఇబ్బందులు పడ్డారు పరిస్థితిని అదుపులోకి తీసుకురావడానికి అధికారులు తక్షణమే చర్యలు చేపట్టాలని ప్రజలు డిమాండ్ చేస్తున్నారు.
అధికారుల నుంచి తక్షణ సహాయం ఆశిస్తున్న బాధితులు:ఈ వరదల కారణంగా నష్టపోయిన ప్రజలకు తక్షణ సహాయం అందించాల్సిన అవసరం ఉంది. వారికి సురక్షితమైన పునరావాస కేంద్రాలను ఏర్పాటు చేయాలి. అంతేకాకుండా, వరద ప్రభావం నుంచి కోలుకోవడానికి వారికి ఆర్థిక సహాయం, నిత్యావసర వస్తువులను పంపిణీ చేయాలి. స్థానిక అధికార యంత్రాంగం ఈ పరిస్థితిని సమీక్షించి, బాధితులకు తగిన సహాయక చర్యలు వేగవంతం చేయాలని ప్రజలు విజ్ఞప్తి చేస్తున్నారు.