रायपूरमध्ये गणपती विसर्जन मिरवणुकीतून हिंदू-मुस्लिम ऐक्याचा आदर्श

रायपूरमध्ये गणपती विसर्जन मिरवणुकीतून हिंदू-मुस्लिम ऐक्याचा आदर्श
रायपूर: दिनांक 6 सप्टेंबर 2025 रोजी अनंत चतुर्थी निमित्त रायपूर येथील गणपती विसर्जन मिरवणूक मोठ्या उत्साहात आणि शांततेत पार पडली. या विसर्जन मिरवणुकीने गेल्या 40 वर्षांपासूनची एक अनोखी परंपरा कायम राखत हिंदू-मुस्लिम ऐक्याचे उत्तम उदाहरण पुन्हा एकदा सादर केले.
रायपूर येथील सार्वजनिक गणेश मंडळाची मिरवणूक जामा मशिदीजवळ पोहोचताच एक विशेष दृश्य पाहायला मिळाले. मशिदीजवळ मुस्लिम बांधवांनी गणपती बाप्पाचे स्वागत केले. फारुख शेठ, शमीम सौदागर आणि सादिक कुरेशी यांच्यासह इतर मुस्लिम बांधवांनी गणपतीच्या मूर्तीची पूजा करून तिला पुष्पहार अर्पण केला. यावेळी, रायपूर पोलीस स्टेशनचे ठाणेदार श्री. निलेश सोळंके, बाळूशेठ जैस्वाल, सुनील देशमाने, डॉ. बाहेती, डॉ. खंडागळे आणि संतोष भोसले यांच्यासह इतर हिंदू बांधवांनी एकमेकांना शाल आणि पुष्पगुच्छ देऊन सत्कार केला.
यावेळी, दोन्ही समुदायांच्या लोकांनी एकमेकांबद्दल आदर आणि सलोख्याची भावना व्यक्त केली, जी रायपूर गावात गेली अनेक दशके टिकून आहे. या मिरवणुकीचे आणखी एक वैशिष्ट्य म्हणजे यामध्ये कोणत्याही मोठ्या वाद्यांचा वापर केला जात नाही. पारंपरिक पद्धतीने टाळ आणि मृदंगाच्या गजरातच ही मिरवणूक काढली जाते, ज्यामुळे शांततापूर्ण आणि भक्तिमय वातावरण कायम राहते.
गावातील सर्व मिरवणुका शांततेत आणि सुरळीत पार पडाव्यात यासाठी ठाणेदार निलेश सोळंके यांच्या नेतृत्वाखाली पोलीस कर्मचारी राहुल जाधव, अख्तर शेख, अनंत कळमकर, लक्ष्मण शिंदे आणि इतर कर्मचारी तसेच होमगार्ड यांनी चोख नियोजन करून उत्तम बंदोबस्त ठेवला होता. त्यांच्या या प्रयत्नांमुळेच सर्व मिरवणुका कोणत्याही अडचणीविना पार पडल्या, ज्याबद्दल नागरिकांनी त्यांचे आभार मानले.
रायपूरच्या या परंपरेतून सर्व समाज बांधवांनी आदर्श घ्यावा असे हे एक खास उदाहरण आहे, जिथे हिंदू आणि मुस्लिम समाज एकजुटीने आणि सलोख्याने राहतात.