సైబర్ నేరాల పట్ల ప్రజలు అప్రమత్తంగా ఉండాలి - మందమర్రి ఎస్.ఐ.

పవర్ తెలుగు దినపత్రిక: 7-09-2025: మందమర్రి:నేటి ఆధునిక సాంకేతిక ప్రపంచంలో సైబర్ నేరాలు రోజురోజుకు పెరిగిపోతున్నాయి. తక్కువ సమయంలో ఎక్కువ డబ్బు సంపాదించవచ్చని, లేదా సులభంగా లోన్లు ఇప్పిస్తామని నమ్మించి గుర్తు తెలియని వ్యక్తులు అమాయకులను మోసం చేస్తున్నారు. తాజాగా మందమర్రికి చెందిన ఓ యువకుడు ఆన్‌లైన్ లోన్ పేరుతో డబ్బు కోల్పోయిన సంఘటన వెలుగులోకి వచ్చింది మందమర్రిలోని 3rd జోన్ లో నివాసం ఉంటున్న యువకుడు , తన చదువు కోసం రూ. 50,000 విద్యార్థి లోన్ కోసం ఆన్‌లైన్‌లో ఒక వెబ్‌సైట్‌లో దరఖాస్తు చేసుకున్నాడు. ఈ ప్రక్రియలో భాగంగా, మోసగాళ్ళు అతని ఆధార్, పాన్ కార్డ్, మరియు ఇతర వ్యక్తిగత వివరాలను సేకరించారు. లోన్ ఆమోదం పొందిందని నమ్మించి, వివిధ రకాల ఛార్జీల పేరుతో విడతలవారీగా రూ. 37,500/- చెల్లించమని కోరారు. ఆ డబ్బు చెల్లించిన తర్వాత కూడా లోన్ మొత్తం రాకపోవడంతో తాను మోసపోయినట్లు ఆ యువకుడికి అర్థమైంది. వెంటనే అతను అప్రమత్తమై సైబర్ క్రైమ్ హెల్ప్‌లైన్ నంబర్ 1930 కు ఫోన్ చేసి ఫిర్యాదు చేశాడు. దీనిపై మందమర్రి ఎస్.ఐ. రాజశేఖర్ కేసు నమోదు చేసి దర్యాప్తు ప్రారంభించారు సైబర్ నేరాల నుండి రక్షణ కోసం కొన్ని ముఖ్య సూచనలు: వ్యక్తిగత వివరాలు జాగ్రత్త: మీ వ్యక్తిగత వివరాలైన ఆధార్, పాన్, బ్యాంక్ అకౌంట్ నంబర్, ఓటీపీ (OTP) వంటి వాటిని ఎట్టి పరిస్థితుల్లోనూ గుర్తు తెలియని వ్యక్తులతో పంచుకోవద్దు. ఏ బ్యాంక్ లేదా ఆర్థిక సంస్థ కూడా ఫోన్ లేదా వాట్సాప్ ద్వారా మీ వ్యక్తిగత వివరాలను అడగదుఅనుమానాస్పద లింక్‌లు, మెయిల్స్: మీకు వచ్చే అనుమానాస్పద ఎస్ఎంఎస్ లేదా ఇమెయిల్ లింక్‌లను క్లిక్ చేయవద్దు. అవి మోసపూరిత వెబ్‌సైట్‌లకు దారి తీయవచ్చు.
ముందస్తు చెల్లింపులు: లోన్, ఉద్యోగం, బహుమతి వంటి వాటి కోసం ఎవరైనా ముందస్తుగా డబ్బులు చెల్లించమని కోరితే, అది మోసమని అనుమానించండి. నిజమైన సంస్థలు ఎప్పుడూ ఇలాంటి వాటికి డబ్బులు అడగవు.
ఆన్‌లైన్ వెబ్‌సైట్‌లు: ఏదైనా లోన్ లేదా ఆర్థిక లావాదేవీల కోసం అధికారిక, ప్రభుత్వ గుర్తింపు పొందిన వెబ్‌సైట్‌లను మాత్రమే ఉపయోగించండి. వెబ్‌సైట్ అడ్రస్‌ను జాగ్రత్తగా పరిశీలించండి.'https'తో మొదలయ్యే వెబ్‌సైట్‌ సురక్షితమైనవిగా భావించవచ్చు తక్షణ చర్య: ఒకవేళ మీరు మోసపోయారని తెలిస్తే, వెంటనే ఆలస్యం చేయకుండా సైబర్ క్రైమ్ హెల్ప్‌లైన్ నంబర్ 1930 కు ఫోన్ చేయండి లేదా నేరుగా పోలీస్ స్టేషన్‌లో ఫిర్యాదు చేయండి మందమర్రి ప్రజలు సైబర్ నేరాల పట్ల అప్రమత్తంగా ఉండాలని, ఏదైనా అనుమానం వస్తే వెంటనే స్థానిక పోలీస్ స్టేషన్‌ను సంప్రదించాలని మందమర్రి పోలీసులు కోరారు.