म्हसवड मध्ये प्रे. मोहम्मद पैगंबरांच्या 1500 व्या जयंतीनिमित्त भव्य मोफत आरोग्य शिबिर

सातारा:- (म्हसवड प्रतिनिधी):
मानवतेचा व सेवाभावाचा अनोखा संदेश देणारे प्रेषित हजरत मोहम्मद पैगंबर यांच्या 1500 व्या जयंतीनिमित्त म्हसवड शहरात विविध धार्मिक व सामाजिक कार्यक्रमांचे आयोजन करण्यात आले आहे. त्याचाच एक महत्त्वाचा भाग म्हणून येत्या ५ सप्टेंबर रोजी भगवान गल्ली येथे भव्य मोफत आरोग्य शिबिर भरविण्यात येणार आहे.

या शिबिराचे उद्घाटन माण तालुक्याचे वैद्यकीय अधिकारी डॉ. लक्ष्मण कोडलकर यांच्या हस्ते होणार असून, शहरातील व ग्रामीण भागातील नागरिकांना या शिबिराचा लाभ घेण्याचे आवाहन आयोजक समितीकडून करण्यात आले आहे.

तज्ज्ञ डॉक्टरांची उपस्थिती

या आरोग्य शिबिरात नागरिकांना विविध आजारांवर मोफत तपासणी, औषधोपचार व मार्गदर्शन मिळणार आहे. त्यासाठी अनेक नामवंत तज्ज्ञ डॉक्टर आपली सेवा देणार आहेत.

हृदयविकार तज्ज्ञ – डॉ. प्रमोद गावडे

अस्थिरोग तज्ज्ञ – डॉ. बाबासाहेब दोलताडे

नेत्ररोग तज्ज्ञ – डॉ. निखिलेश शेटे

दंतरोग तज्ज्ञ – डॉ. सौरभ दोशी


याशिवाय म्हसवड प्राथमिक आरोग्य केंद्रातील अधिकारी व वैद्यकीय कर्मचारी देखील शिबिरात सक्रिय सहभाग नोंदवणार आहेत.

जयंतीनिमित्त विविध उपक्रम

मुस्लिम समाजाकडून पैगंबरांच्या जयंतीनिमित्त दरवर्षी धार्मिक कार्यक्रमांसोबतच समाजाभिमुख उपक्रमांना प्राधान्य दिले जाते.

मशिदींमध्ये कुरआन पठण

पैगंबरांच्या जीवन व शिकवणीवर व्याख्यानमाला

मिरवणुका व सजावट

रक्तदान शिबिरे, आरोग्य शिबिरे, सामूहिक भोजन


यामधून "मानवतेची सेवा हाच खरी ईबादत" हा पैगंबरांचा संदेश लोकांपर्यंत पोहोचवला जातो.

नागरिकांसाठी सुवर्णसंधी

या मोफत आरोग्य शिबिरामुळे शेकडो नागरिकांना तज्ज्ञ डॉक्टरांच्या थेट मार्गदर्शनाचा लाभ व मोफत औषधपचार मिळणार असून, समाजातील गरजू व वंचित घटकांपर्यंत मोफत आरोग्यसेवा पोहोचण्यास मदत होणार आहे.

आयोजक समितीचे म्हणणे आहे की, "पैगंबरांच्या जयंतीनिमित्त प्रत्येकाने समाजासाठी काहीतरी परत द्यावे. आरोग्यसेवेच्या माध्यमातून आम्ही ही शिकवण जिवंत ठेवण्याचा प्रयत्न करत आहोत."