Aima media जण जण की आवाज दिनांक 1/09/2025am :4:55 Pune Metro in Ganeshotsav : मेट्रो प्रवासी संख्येचा नवा उच्चांक, गणे

Aima media जण जण की आवाज
दिनांक 1/09/2025am :4:55
Pune Metro in Ganeshotsav : मेट्रो प्रवासी संख्येचा नवा उच्चांक, गणेशोत्सवानिमित्त रेकॉर्डब्रेक गर्दी; मेट्रो ठरतेय पसंती
Pune Metro in Ganeshotsav : पुणे मेट्रोमध्ये शनिवारी विक्रमी गर्दी नोंदवली गेली आहे. एका दिवसात लाखो प्रवाशांनी प्रवास केला. मंडई स्थानकावर सर्वाधिक गर्दी झाली. पिंपरी-चिंचवड ते स्वारगेट मार्गावर दोन लाखांहून अधिक प्रवाशांनी प्रवास केला. गणेशोत्सवामुळे प्रवाशांची संख्या वाढली आहे.पुणे : पुणे मेट्रोतून शनिवारी एका दिवसामध्ये तीन लाख ६८ हजार प्रवाशांनी प्रवास केला. मेट्रोच्या इतिहासामध्ये एका दिवसांमध्ये सर्वाधिक प्रवाशांचा हा नवा उच्चांक ठरला; तसेच मंडई मेट्रो स्थानकावरून सर्वाधिक ५६ हजार प्रवाशांनी प्रवास केल्याचे दिसून आले.वनाझ ते रामवाडी आणि पिंपरी-चिंचवड ते स्वारगेट मार्गावर मेट्रो सुरू आहे. या मार्गांवर आतापर्यंत गेल्या वर्षी गणपती विसर्जन मिरवणुकीच्या दिवशी उच्चांकी तीन लाख ४६ हजार प्रवाशांनी मेट्रोतून प्रवास केला होता. यंदा गणपती उत्सवात पहिल्यांदाच जिल्हा न्यायालय ते स्वारगेट मार्गावर मेट्रो सेवा सुरू झाली आहे. त्यामुळे प्रवासीसंख्या वाढणार असल्याचे निश्चित होते. मेट्रोने गणेशोत्सवात पहाटे दोनपर्यंत सेवा सुरू करण्यास ३० ऑगस्टपासून सुरुवात केली. जादा वेळ मेट्रो सेवा सुरू केल्यानंतर पहिल्या दिवशीच मेट्रोतून तीन लाख ६८ हजार प्रवाशांनी प्रवास केल्याचे दिसून आले. ही प्रवासी संख्या आतापर्यंतची सर्वाधिक ठरली आहे. ‘महामेट्रो’कडून गणेश विसर्जनापर्यंत मेट्रो सेवा पहाटे दोनपर्यंत सुरू राहणार आहे. तर, विसर्जनाच्या दिवशी रात्रभर सेवा सुरू असणार आहे. त्यामुळे मेट्रोच्या प्रवासी संख्येत यंदा आणखी नवा उच्चांक पाहायला मिळणार आहे; तसेच शनिवारी पहिल्यांदाच पिंपरी-चिंचवड ते स्वारगेट मार्गावर एका दिवसात दोन लाख प्रवाशांनी प्रवास केल्याचे दिसून आले.
आगामी काही दिवस गर्दी अशीच वाढत राहणार असून, मध्यवस्तीत लवकर पोहोचण्यासाठी अनेक जण मेट्रोलाच पसंती देताना दिसत आहेत. मेट्रोकडूनही गर्दीचे नियोजन करण्यात येत आहे.

पुलाचे आज उद्घाटन
छत्रपती संभाजी उद्यान मेट्रो स्थानक मेट्रोसोबत जोडणाऱ्या नदीवरील पुलाचे काम पूर्ण झाले आहे. त्या पुलाची नुकतीच वजनाची चाचणीदेखील घेण्यात आली आहे. त्यामुळे आज, सोमवारी मुख्यमंत्री देवेंद्र फडणवीस यांच्या हस्ते या पुलाचे उद्घाटन होणार आहे. त्यानंतर हा पूल प्रवाशांसाठी खुला केला जाणार आहे. या पुलामुळे नारायण पेठ, शनिवार पेठ मेट्रो स्थानकासोबत जोडली जाणार आहे. याचा गणेशोत्सवात प्रवाशांना मोठा फायदा होणार आहे