सकाळ शाळांच्या वेळेबाबत ‘हर घर तिरंगा’ अभियानात संभ्रम — काही तालुक्यांत अंमलबजावणी, तर काही ठिकाणी थांबले आदेश

चंद्रपूर, दि. 12 ऑगस्ट —
देशभरात जोमाने सुरू असलेल्या “हर घर तिरंगा” अभियानाच्या पार्श्वभूमीवर जिल्हा परिषद शिक्षण विभाग, चंद्रपूर यांनी दिनांक 12 ऑगस्ट 2025 रोजी एक महत्त्वाचे पत्रक जारी केले. या पत्रानुसार, 13, 14 व 15 ऑगस्ट रोजी सकाळी 7:30 वाजता झेंडा वंदन कार्यक्रम घेण्यात यावा, असे निर्देश होते. या कार्यक्रमासाठी सर्व शिक्षक, शिक्षकेत्तर कर्मचारी, विद्यार्थी, शाळा व्यवस्थापन समितीचे सदस्य, पालक व स्थानिक नागरिक उपस्थित राहतील, असे स्पष्ट करण्यात आले.
परंतु, या पत्रावर संबंधित अधिकाऱ्यांच्या स्वाक्षऱ्या नसल्यामुळे जिल्ह्यातील अनेक शाळांमध्ये संभ्रमाचे वातावरण निर्माण झाले आहे. काही तालुक्यांतील गटशिक्षणाधिकाऱ्यांनी हे पत्र स्वीकारून त्यानुसार कार्यवाहीचे आदेश काढले, तर काही तालुक्यांत स्वाक्षरी नसल्याचे कारण देत कोणतीही सूचना न देण्याचा निर्णय घेतला.
या द्विधा भूमिकेमुळे सकाळ शाळा नेमक्या कोणत्या वेळेत घ्यायच्या, हा प्रश्न शिक्षक व शाळा व्यवस्थापना समोर निर्माण झाला आहे. काही शाळांनी आधीच सकाळी 7:30 वाजता झेंडा वंदनाची तयारी सुरू केली आहे, तर इतर काही शाळांमध्ये याबाबत अद्यापही अनिश्चितता आहे.
सदर पत्रात “हर घर तिरंगा” अभियानाचा कालावधी 2 ते 15 ऑगस्ट असा नमूद असून, 13, 14 व 15 ऑगस्ट रोजी सकाळच्या वेळेत विशेष झेंडा वंदन कार्यक्रमाचे आयोजन करण्याची योजना आहे. तसेच, या कार्यक्रमाचे अहवाल व छायाचित्रे www.harghartiranga.com या संकेतस्थळावर अपलोड करण्याचे निर्देशही देण्यात आले आहेत.
दरम्यान, शिक्षक वर्गामध्ये या संदर्भात एकसूत्रीपणा व स्पष्ट सूचना देण्याची मागणी होत आहे. कारण एकीकडे देशभक्तीचा जल्लोष असलेल्या या अभियानात विद्यार्थ्यांचा सक्रिय सहभाग अपेक्षित असताना, वेळेबाबतची अनिश्चितता ही उत्साहावर पाणी फेरू शकते, अशी भावना व्यक्त केली जात आहे.
शिक्षण विभागाने तातडीने अधिकृतरीत्या स्वाक्षरीसह आदेश काढून संपूर्ण जिल्ह्यात एकच वेळ लागू करण्याची मागणी जिल्ह्यातील शिक्षक संघटनांकडून होत आहे. अन्यथा, काही ठिकाणी सकाळ शाळा व काही ठिकाणी नियमित वेळेप्रमाणे शाळा सुरू होण्याची शक्यता आहे, ज्यामुळे कार्यक्रमाच्या एकसूत्रतेला धक्का बसेल, असे मत अनेकांनी नोंदवले आहे.