समुद्री कासव संवर्धनावर व्याख्यान; मत्स्य अभियांत्रिकी तंत्रनिकेतनमध्ये कांदळवन सप्ताहानिमित्त मोहन उपाध्ये यांचे मार्गदर्शन

मत्स्य अभियांत्रिकी तंत्रनिकेतन, शिरगाव, रत्नागिरी येथे "कांदळवन (मॅन्ग्रुव) सप्ताह" निमित्त आयोजित कार्यक्रमात "समुद्री कासव संवर्धन" या विषयावर श्री. मोहन उपाध्ये यांचे माहितीपूर्ण व मार्गदर्शनपर व्याख्यान झाले.
दुसऱ्या आणि तिसऱ्या वर्षातील विद्यार्थ्यांसाठी आयोजित या व्याख्यानात श्री. उपाध्ये यांनी जगभरातील सात समुद्री कासव प्रजाती, त्यांची ओळख, संवर्धनाच्या विविध पद्धती व त्याची आवश्यकता याविषयी सविस्तर आणि सोप्या भाषेत माहिती दिली.
हा कार्यक्रम जलजीविका संस्था आणि कांदळवन प्रतिष्ठान यांच्या संयुक्त विद्यमाने आयोजित करण्यात आला होता. कार्यक्रमाची सुरुवात मत्स्य अभियांत्रिकी तंत्रनिकेतनचे सहाय्यक प्राध्यापक डॉ. राकेश जाधव यांनी श्री. मोहन उपाध्ये यांचे स्वागत करून केली.
कार्यक्रमाला जलजीविका संस्था आणि कांदळवन प्रतिष्ठानचे सदस्य, महाविद्यालयाचे कर्मचारी, विद्यार्थी आणि विद्यार्थिनी मोठ्या संख्येने उपस्थित होते. कार्यक्रमाचे आयोजन प्राचार्य डॉ. केतन चौधरी यांच्या मार्गदर्शनाखाली सहाय्यक प्राध्यापक श्री. निलेश मिरजकर, श्री. रोहित बुरटे, श्री. सुशील कांबळे आणि कार्यालय अधीक्षक श्री. विलास यादव यांनी केले.