सकाळी गर्दी, दुपारी शुकशुकाट, सायंकाळी मात्र पुन्हा रांगा.....

जळगाव : विधानसभेच्या निवडणुकीसाठी जळगाव शहर व जळगाव ग्रामीण मतदारसंघात संमिश्र चित्र पाहायला मिळाले. जळगाव शहरासह जळगाव ग्रामीण. मतदारसंघात सकाळच्या वेळेस मतदारांच्या रांगा लागलेल्या होत्या. मात्र, त्यानंतर दुपारी १ ते ३ दरम्यान मतदारांची संख्या कमी झाली, त्यानंतर मात्र दोन्हीही मतदारसंघांत मतदारांच्या रांगा लागलेल्या पाहायला मिळाल्या.

सकाळच्या वेळेस जळगाव शहरातील बऱ्याच मतदार केंद्रांवर मतदारांच्या रांगा लागल्या होत्या. पहिल्या दोन तासांत जळगाव शहर मतदारसंघात ६.३७ टक्के मतदान झाले होते. मात्र, वेळ वाढत गेल्यानंतर मतदारांची संख्याही कमी झाली. दुपारी १ ते ३ वाजेदरम्यान जळगाव शहर मतदारसंघातील जवळजवळ सर्वच मतदारसंघांत शुकशुकाट निर्माण झाला होता. त्यानंतर दुपारी ३ वाजेनंतर मात्र परिस्थितीत बदल होऊन, शहरातील मतदान केंद्रांवर लांबच लांब रांगा लागल्या होत्या.