మంత్రివర్గంపై చంద్రబాబు కసరత్తు.. పవన్ కళ్యాణ్, నారా లోకేష్‌కు కీలక శాఖలు!

ఆంధ్రప్రదేశ్‌లో కొత్త ప్రభుత్వం కొలువుదీరనుంది. ఏపీ ముఖ్యమంత్రిగా నారా చంద్రబాబు నాయుడు జూన్ 12న ప్రమాణ స్వీకారం చేయనున్నారు. ఈ నేపథ్యంలో మంత్రివర్గ కూర్పుపై టీడీపీ అధినేత కసరత్తు చేస్తున్నారు. మంత్రివర్గంలో ఎవరెవరు ఉండాలి.. ఏ పార్టీకి ఎన్ని మంత్రి పదవులు కేటాయించాలనే దానిపై చంద్రబాబు సోమవారం సుధీర్ఘమైన కసరత్తు చేశారు. ఢిల్లీ పర్యటన పూర్తి చేసుకుని రాష్ట్రానికి తిరిగి చేరుకున్న చంద్రబాబు నాయుణ్ని.. సోమవారం పలవురు నేతలు కలిశారు. మంత్రిపదవులు ఆశిస్తున్న నేతలు ఆయన ఇంటివద్దకు క్యూ కట్టారు. దీంతో ఏ పార్టీకి ఎన్ని మంత్రిపదవులు ఇవ్వాలనే దానిపై చంద్రబాబు కసరత్తు చేస్తున్నారు.

మరోవైపు చంద్రబాబు నాయుడు మంత్రివర్గంలో జనసేన అధినేత పవన్ కళ్యా్ణ్ చేరటం ఖాయంగా తెలుస్తోంది. పవన్ కళ్యాణ్ డిప్యూటీ సీఎం పదవి స్వీకరించేందుకు అంగీకరించినట్లు వార్తలు వస్తున్నాయి. ఓ జాతీయ మీడియా ఛానెల్‌కు ఇచ్చిన ఇంటర్వ్యుూలో పవన్ ఈ విషయాన్ని చూచాయగా తెలిపారు. ఇక డిప్యూటీ సీఎం హోదాతో పాటుగా పవన్ కళ్యాణ్‌కు హోం, గ్రామీణాభివృద్ధి శాఖలు కేటాయిస్తారని టాక్ వినిపిస్తోంది. అలాగే నారా లోకేష్‌కు ఐటీ, పరిశ్రమలు, పట్టణాభివృద్ధి శాఖలు కేటాయిస్తారని సమాచారం.
ఎన్నికల ప్రచారంలో భాగంగా టీడీపీ, జనసేన పార్టీలు పలు హామీలు ఇచ్చాయి. ప్రభుత్వం కొలువుదీరనుండటంతో హామీల అమలు కీలకంగా మారనుంది. అందులో భాగంగానే పవన్ కళ్యాణ్, నారా లోకేష్‌లకు ఈ మంత్రిపదవులు ఇస్తారని సమాచారం. అలాగే కూటమిలోని మూడు పార్టీల మధ్య సమన్వయం కూడా ముఖ్యం కానుంది. దీంతో వీరిద్దరికీ ఈ కీలకశాఖలు అప్పగిస్తారనే వార్తలు వస్తున్నాయి. అయితే అమరావతి రాజధాని అభివృద్ధి.. గ్రామీణాభివృద్ధి శాఖలో కీలకం కానుంది. దీంతో ఈ శాఖను గతంలో పర్యవేక్షించిన నారాయణకు అప్పగించవచ్చనే వార్తలు కూడా వినిపిస్తున్నాయి.

మరోవైపు మంత్రివర్గంలో జనసేన, బీజేపీ మంత్రుల సంఖ్యపైనా కూడా చంద్రబాబు ఒక అవగాహనకు వచ్చినట్లు తెలిసింది. జనసేనకు నాలుగు మంత్రిపదవులు దక్కనున్నట్లు సమాచారం. బీజేపీకి రెండు మంత్రి పదవులు కేటాయించే అవకాశాలు ఉన్నాయి. వీటిపైన త్వరలోనే స్పష్టత రానుంది.