నెల్లూరు మహిళలకు శుభవార్త.. ఉచిత శిక్షణ, ఉద్యోగాలు!

నెల్లూరులో మహిళలకు శుభవార్త.. ఉచిత స్కిల్ డెవ‌ల‌ప్‌మెంట్‌ సెంటర్ ప్రారంభమైంది. నగరంలోని నారాయ‌ణ ఇంజ‌నీరింగ్ కాలేజీలో మాజీ మంత్రి పొంగూరునారాయణ ఈ సెంటర్‌ను ప్రారంభించారు. ఇంజినీరింగ్ కాలేజీ డైరెక్ట‌ర్‌, ప్రిన్సిపాల్‌, డిపార్ట్ మెంట్ వారి ఆధ్వ‌ర్యంలో ఈ స్కిల్ డెవ‌ల‌ప్‌మెంట్ సెంట‌ర్‌ను నిర్వహిస్తున్నారు. ఎన్నికలకు ముందు దాదాపు 600మందితో మహిళా వింగ్‌ను ఏర్పాటు చేశామని.. వీరికి ఆసక్తి ఉన్న రంగాల్లో శిక్షణ ఇస్తామని నారాయణ తెలిపారు. ఇక్కడ శిక్షణ పొందినవారికి ఐటీ ఉద్యోగాలు.. హాస్పిట‌ల్స్, బిజినెస్‌ల‌లో, ప‌లు కంపెనీల్లో వారికి ఉద్యోగాలు వ‌చ్చే విధంగా చేస్తామని హామీ ఇచ్చారు.
వాస్తవానికి ఎన్నిక‌లకు ముందే ఈ సెంటర్ ప్రారంభించాలనుకున్నామని.. కానీ ఎన్నికల్లో అందరూ బిజీగా ఉంటారని వాయిదా వేశామన్నారు నారాయణ. అందుకే పోలింగ్ ముగిసిన తర్వాత ప్రారంభించామని తెలిపారు. నేటి నుంచి 30 మందితో.. ఉద‌యం 9 గంట‌ల నుంచి మ‌ధ్యాహ్నం 1 గంట వ‌ర‌కు ఒక బ్యాచ్‌.. అలాగే సాయ‌త్రం 3 గంట‌ల నుంచి 7 గంట‌ల వ‌ర‌కు మరో బ్యాచ్‌కు బేసిక్స్ చెప్పే విధంగా ఈ ప్రోగ్రామ్‌ను ఇంజ‌నీరింగ్ కాలేజీ డైరెక్ట‌ర్‌, ప్రిన్సిపాల్‌, డిపార్ట్ మెంట్‌ డిజైన్ చేసినట్లు తెలిపారు.
గ‌తంలో తన ద‌గ్గ‌ర ఆఫీస్ బాయ్‌లుగా ప‌ని చేసిన ఎంతోమంది.. ఇప్పుడు అమెరికాలో ఉన్నార‌ని గుర్తు చేశారు మాజీ మంత్రి నారాయణ. మ‌హిళ‌లంద‌రూ స్కిల్ డెవ‌ల‌ప్‌మెంట్‌ని బాగా అవ‌గాహ‌న చేసుకోవాల‌ని.. అలాగే ఈ ప్రోగ్రామ్‌ను నారాయ‌ణ ఇంజ‌నీరింగ్ కాలేజీ డైరెక్ట‌ర్‌, ప్రిన్సిపాల్‌, డిపార్ట్ మెంట్ విజ‌య‌వంతంగా నిర్వ‌హించాల‌ని సూచించారు. టీడీపీ ప్ర‌భుత్వం అధికారంలోకి రాగానే నెల్లూరులో స్కిల్ డెవ‌ల‌ప్‌మెంట్ సెంట‌ర్ ఏర్పాటు చేసి యువ‌తీ యువ‌కుల‌కు ఉపాధి అవకాశాలు కల్పిస్తామన్నారు.