जव्हार!! उपजिल्हा रुग्णालय जव्हार येथे रोटरी पतंगशाह कुटीर रुग्णालय डायलिसिस केंद्राचा उद्घाटन सोहळा संपन्न.!!

जव्हार तालुक्यातील पतंगशाह उपजिल्हा रुग्णालय हे गेल्या अनेक दशकांपासून दुर्गम आणि आदिवासी भाग असलेल्या जव्हार,मोखाडा,विक्रमगड,वाडा व डहाणू तालुक्यातील रुग्णांवर यशस्वीपणे उपचार करीत आले आहे.उपलब्ध सोयी सुविधा नुसार येथील वैद्यकीय अधिकारी रुग्णसेवेची सेवा अविरतपणे चालवीत आहे.अशातच या ग्रामीण भागातील रुग्णांना अधिक चांगल्या प्रकारे सेवा उपलब्ध व्हावी म्हणून रोटरी क्लब ऑफ मुंबई वेस्ट,कोस्ट गोरेगाव यांच्या विद्यमानाने मंगळवारी डायलिसिस सेवेचा उद्घाटन सोहळा अप्पर जिल्हाधिकारी भाऊसाहेब फटांगरे, जिल्हा शल्यचिकित्सक डॉ. रामदास मराड यांच्या हस्ते करण्यात आला.कै. गंगाबाई विष्णू गोसावी यांच्या स्मरणार्थ उभारण्यात आलेल्या रोटरी पतंगशाह कुटीर रुग्णालय डायलिसिस केंद्राचा जव्हार तालुका व आसपासच्या मोखाडा, वाडा, विक्रमगड तालुक्यातील रुग्णांना लाभ होणार असून ही सेवा मोफत असल्याचे आयोजकांनी सांगितले.
केवळ डायलिसिस करिता शेकडो किलोमीटर चा प्रवास खर्च करून जाणे या गोष्टीला अटकाव होऊन स्थानिक ठिकाणी डायलिसिस सुविधा उपलब्ध झाल्याने रुग्णांनी समाधान व्यक्त केले आहे.रोटरी क्लबच्या माध्यमातून अतिशय सुसज्ज अशा डायलिसिस केंद्राचा रुग्णांना मोठा आधार होणार आहे.सदर उद्घाटन सोहळा प्रसंगी अप्पर जिल्हाधिकारी भाऊसाहेब फटांगरे, पालघर चे नवनिर्वाचित जिल्हा शल्यचिकित्सक डॉ.रामदास मराड ,जव्हार ,मोखाडा रुग्णालयाचे वैद्यकीय अधीक्षक डॉ.भरतकुमार महाले, डॉ. प्रशांत राजगुरु, रोटरी क्लबचे सर्व पदाधिकारी,सदस्य तसेच उपजिल्हा रुग्णालयातील सर्व वैद्यकीय अधिकारी व कर्मचारी, जव्हार परिसरातील प्रतिष्ठित नागरिक ,सामाजिक कार्यकर्ते,पत्रकार बंधू उपस्थित होते.


कोट-
जव्हार सारख्या आदिवासी आणि दुर्गम भागात डायलिसिस सेवा सुरू झाल्याने येथील रुग्णांची आर्थिक बचत होऊन तालुक्यातच डायलिसिस सुविधेचा लाभ आता नागरिकांना घेता येणार आहे.

डॉ.रामदास मराड,जिल्हा शल्यचिकित्सक,पालघर


जव्हार हे मध्यवर्ती ठिकाण असल्याने आसपासच्या तालुक्यातील रुग्णांना रोटरीद्वारे उभारण्यात आलेल्या डायलिसिस केंद्रामुळे मोठा आधार मिळून योग्य वेळी उपचार घेण्यास फायदेशीर ठरू शकेल.

भाऊसाहेब फटांगरे,अप्पर जिल्हाधिकारी,पालघर