കോൺഗ്രസിന്റെ ഗ്യാരന്‍റി പദ്ധതികൾക്ക് തടയിട്ട് കേന്ദ്ര തെരഞ്ഞെടുപ്പ് കമ്മീഷൻ

ബംഗളൂരു: കർണാടകയിലെ ഉപതിരഞ്ഞെടുപ്പിന് മുൻപായി സർക്കാർ ഗ്യാരൻറി പദ്ധതികളിലെ ഫണ്ട് വിതരണം ചെയ്‌തത് സംബന്ധിച്ച് കേന്ദ്ര തെരഞ്ഞെടുപ്പ് കമ്മീഷൻ കർശന നടപടി സ്വീകരിച്ചു. പെരുമാറ്റച്ചട്ട ലംഘനമായേക്കാമെന്ന സംശയത്തോടെ വിശദീകരണം ചോദിച്ചിട്ടുണ്ട്.

വ്യാഴാഴ്ച വോട്ടെടുപ്പ് നടക്കുന്ന മണ്ഡലങ്ങളിൽ പുതിയ സാമ്പത്തിക ആനുകൂല്യങ്ങൾ അനുവദിച്ചതിനെക്കുറിച്ച് ചീഫ് സെക്രട്ടറി ശാലിനി രജനീഷിനോട് വിശദീകരണം തേടാൻ കമ്മീഷൻ ആവശ്യപ്പെട്ടു. ഏപ്രിൽ 2-ന് അയച്ച കത്ത് ചൊവ്വാഴ്ച കോൺഗ്രസ് പുറത്തുവിട്ടതോടെ വിഷയം രാഷ്ട്രീയ വിവാദമായി മാറി.

ഗൃഹലക്ഷ്മി, യുവനിധി, ശക്തി, ഗൃഹജ്യോതി, അന്നഭാഗ്യ എന്നീ അഞ്ചു ഗ്യാരൻറി പദ്ധതികൾ പ്രകാരം ദാവൻഗരെ, ബാഗൽകോട്ട് ജില്ലകളിലെ ഗുണഭോക്താക്കൾക്ക് തുക അനുവദിച്ചതായി കമ്മീഷൻ കണ്ടെത്തി. തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്നതിനാൽ, കമ്മീഷൻ മുൻകൂർ അനുമതിയില്ലാതെ ഇത്തരം ഫണ്ടുകൾ വിതരണം ചെയ്യരുതെന്നും കത്തിൽ കർശനമായി സൂചിപ്പിച്ചു.