ସରସ୍ଵତୀ ଶିଶୁ ବିଦ୍ୟା ମନ୍ଦିର, ସ୍ୱର୍ଣ୍ଣକ୍ଷେତ୍ର, ଗଦଗଦିରେ ଭବ୍ୟ ଭାବେ ପାଳିତ ହେଲା ଶ୍ରୀରାମ ନବମୀ।

*ସରସ୍ଵତୀ ଶିଶୁ ବିଦ୍ୟା ମନ୍ଦିର, ସ୍ୱର୍ଣ୍ଣକ୍ଷେତ୍ର, ଗଦଗଦିରେ ଭବ୍ୟ ଭାବେ ପାଳିତ ହେଲା ଶ୍ରୀରାମ ନବମୀ*


ସ୍ୱର୍ଣ୍ଣକ୍ଷେତ୍ର, ଗଦଗଦି:୨୬/୦୩, ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଚନ୍ଦ୍ରଙ୍କ ପବିତ୍ର ଜନ୍ମୋତ୍ସବ ଶ୍ରୀରାମ ନବମୀ ଅବସରରେ ସରସ୍ଵତୀ ଶିଶୁ ବିଦ୍ୟା ମନ୍ଦିର, ସ୍ୱର୍ଣ୍ଣକ୍ଷେତ୍ର, ଗଦଗଦିରେ ଭବ୍ୟ ଓ ଆଧ୍ୟାତ୍ମିକ ପରିବେଶ ମଧ୍ୟରେ ମହା ସମାରୋହରେ ପାଳିତ ହୋଇଯାଇଛି। ସମ୍ପୂର୍ଣ୍ଣ ପ୍ରାଙ୍ଗଣ ଭକ୍ତିମୟ ମାହୋଲରେ ମଗ୍ନ ଥିବା ବେଳେ ଶିଶୁମାନଙ୍କର ଉତ୍ସାହ ଓ ଶିକ୍ଷକ-ଶିକ୍ଷୟିତ୍ରୀମାନଙ୍କର ସକ୍ରିୟ ଭୂମିକା କାର୍ଯ୍ୟକ୍ରମକୁ ଆକର୍ଷଣୀୟ କରିଥିଲା।

ଏହି ଅବସରରେ ଶିଶୁ ବିଦ୍ୟା ମନ୍ଦିର ବିଦ୍ୱତ୍ ପରିଷଦର ସଭାପତି ଶ୍ରୀ ଦିବାକର ମହାନ୍ତ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ସେ ତାଙ୍କର ଅଭିଭାଷଣରେ ପ୍ରଭୁ ଶ୍ରୀରାମଙ୍କ ଧରାବତରଣର ମୂଳ ଉଦ୍ଦେଶ୍ୟ, ଧର୍ମ ପାଳନ, ସତ୍ୟ, ନୀତି ଓ ଆଦର୍ଶ ଜୀବନ ନେଇ ଉପସ୍ଥିତ ଶିଶୁ ଭାଇ-ଭଉଣୀମାନଙ୍କୁ ମାର୍ଗଦର୍ଶନ କରିଥିଲେ। ସେ ଶିଶୁମାନଙ୍କୁ ଶ୍ରୀରାମଙ୍କ ଆଦର୍ଶକୁ ଜୀବନରେ ଅନୁସରଣ କରିବାକୁ ପ୍ରେରିତ କରିଥିଲେ।

କାର୍ଯ୍ୟକ୍ରମର ଆରମ୍ଭରେ ପ୍ରଧାନ ଆଚାର୍ଯ୍ୟ ଶ୍ରୀ ପୁରୁଜିତ୍ ମୁନି ଅତିଥିମାନଙ୍କ ପରିଚୟ ପ୍ରଦାନ କରି ସ୍ୱାଗତ ଭାଷଣ ରଖିଥିଲେ। ପରେ ପ୍ରଭୁ ଶ୍ରୀରାମଙ୍କ ବେଶଭୂଷାରେ ଆସିଥିବା ଶିଶୁମାନଙ୍କୁ ବନ୍ଦାପନା କରାଯାଇଥିଲା, ଯାହା ସଭାସ୍ଥଳରେ ଭକ୍ତିମୟ ଭାବନାକୁ ଆରୋ ଗଭୀର କରିଥିଲା।

ଗୁରୁମା ଝୁନୁ ମହାନ୍ତ ଶ୍ରୀରାମଙ୍କ ଜୀବନୀ, ତାଙ୍କର ଆଦର୍ଶ ଚରିତ୍ର ଓ ରାମାୟଣର ଶିକ୍ଷାତ୍ମକ ପାଠ ଉପରେ ବିସ୍ତୃତ ଆଲୋଚନା କରିଥିଲେ। ଏହା ଶିଶୁମାନଙ୍କ ପାଇଁ ଶିକ୍ଷାମୂଳକ ଓ ପ୍ରେରଣାଦାୟକ ହୋଇଥିଲା।
କାର୍ଯ୍ୟକ୍ରମଟିର ସଂଯୋଜନା ଗୁରୁମା ପ୍ରତିଭା ଦାସ କରିଥିବା ବେଳେ, ଗୁରୁମା ପ୍ରତିମା ମହାନ୍ତଙ୍କ ଦ୍ୱାରା ଭକ୍ତିମୟ ଗୀତ ପ୍ରସ୍ତୁତି ସଭାର ମାହୋଲକୁ ଅଧିକ ଆକର୍ଷଣୀୟ କରିଥିଲା।

ଶେଷରେ ଗୁରୁଜୀ ସନାତନ ମହାନ୍ତ ଧନ୍ୟବାଦ ଅର୍ପଣ କରି ସମସ୍ତ ଅତିଥି, ଅଭିଭାବକ ଓ ସହଯୋଗୀଙ୍କୁ କୃତଜ୍ଞତା ଜଣାଇଥିଲେ। ସମସ୍ତ ଆଚାର୍ଯ୍ୟ ଓ ଆଚାର୍ଯ୍ୟାମାନଙ୍କ ସମନ୍ୱୟ ଓ ପ୍ରୟାସରେ କାର୍ଯ୍ୟକ୍ରମଟି ସଫଳ ଭାବେ ସମାପ୍ତ ହୋଇଥିଲା।

ଏହି ଶ୍ରୀରାମ ନବମୀ ଉତ୍ସବ ମାଧ୍ୟମରେ ଶିଶୁମାନଙ୍କ ମନରେ ନୈତିକ ମୂଲ୍ୟବୋଧ ଓ ଭାରତୀୟ ସଂସ୍କୃତି ପ୍ରତି ଆସ୍ଥାକୁ ଆରୋ ଦୃଢ଼ କରାଯାଇଥିବା ଦେଖିବାକୁ ମିଳିଥିଲା।

କମଳଲୋଚନ ମହାନ୍ତ ଙ୍କ ରିପୋର୍ଟ।