Is the 10th Schedule Being Ignored in Telangana

Telangana Mein Jamhooriat Aur 'Anti-Defection Law' Par Uthte Sawal
Hyderabad: Telangana ki maujuda siyasat mein "defections" (dal-badal) ka mamla ab ek sangeen mod ikhtiyar kar chuka hai. Hon’ble Assembly Speaker Gaddam Prasad Garu ke iqdamaat aur internet par maujood thos sabooton ke darmiyan ek wazeh tazaad (contradiction) nazar aa raha hai. Ek zimmedar reporter ke taur par, markazi sawal yeh hai ki jab poori riyasat ne apni aankhon se dekha ki BRS ke MLAs ne apni purani party chhodi aur khud Wazir-e-Aala ne unhe sarvajanik taur par Congress ka 'kanduva' pehnakar party mein shamil kiya, toh yeh haqeeqat kaghazon par kaise gayab ho gayi? Mazeed yeh ki, Congress party ki janib se in muna-harif (defected) umeedwaro ko Lok Sabha intikhabat ke liye B-Form jari karna unki wafadari tabdeel hone ka ek na-qabil-e-tardeed (undeniable) saboot hai.
Secunderabad Lok Sabha halkey se BJP ke senoir neta aur Hon’ble Minister G. Kishan Reddy Garu ki kamyabi ek alag intikhabi natija hai, lekin kya unki jeet un tamam sabooton ko mita deti hai jo deewar par likhe huye wazeh hain? Telangana ki awam aaj yeh sawal kar rahi hai ki kya Congress ka wada-karda "Nyaya" (Insaaf) asal mein "Anyaya" (Na-insaafi) mein tabdil ho chuka hai? Agar jamhoori riwayaat ko pas-e-pusht daal kar "defections" ki sarparasti ki jaye, toh yeh na sirf hamare Aayeen (Constitution) ki tauheen hai balki jamhooriat ka khula mazak bhi hai. Jamhoori idaron par awam ka aitmad bahal karne ke liye in sawalon ka jawab dena ab intehayi zaroori hai.
Reporting by:
Syed Mukaram Uddin