📰 ( सार्वजनिक हितासाठी )

📰 ( सार्वजनिक हितासाठी )
उपजिल्हा रुग्णालय, दौंड येथे डिलिव्हरी रुग्णांकडून बेकायदेशीर खर्च करून घेण्याचा प्रकार — दोषींवर तातडीच्या चौकशीची व कायदेशीर कारवाईची मागणी
दौंड (जि. पुणे) —
उपजिल्हा रुग्णालय, दौंड येथे डिलिव्हरीसाठी दाखल होणाऱ्या रुग्णांच्या नातेवाईकांकडून रुग्णालयातील काही कर्मचाऱ्यांकडून डायरी, रजिस्टर, पेन, स्टेशनरी साहित्य, हँडवॉश इत्यादी वस्तू बाहेरून आणण्यास भाग पाडले जात असल्याच्या गंभीर तक्रारी समोर येत आहेत. तसेच “तुम्हाला सर्व काही मोफत मिळणार नाही” अशा प्रकारची अपमानास्पद व धमकीवजा भाषा रुग्णांच्या घरच्यांना वापरली जात असल्याचे निदर्शनास आले आहे.
ही बाब अत्यंत गंभीर असून ती राष्ट्रीय आरोग्य अभियान (NHM), जननी सुरक्षा योजना, मातृत्व सुरक्षा योजना तसेच शासकीय रुग्णालयातील मोफत सेवा धोरणांच्या स्पष्ट विरोधात आहे. शासनाच्या नियमांनुसार शासकीय उपजिल्हा रुग्णालयामध्ये डिलिव्हरीसाठी आवश्यक सर्व औषधे व साहित्य मोफत उपलब्ध करून देणे बंधनकारक असताना रुग्णांकडून खर्च करून घेणे हे बेकायदेशीर, अनैतिक व अमानवीय आहे.
दौंड तालुक्यात मोठ्या प्रमाणावर
गोरगरीब कुटुंबे, वीटभट्टी व ऊसतोड कामगार, भटक्या-विमुक्त समाजातील नागरिक तसेच शेतकरी वर्ग वास्तव्यास आहेत. अशा आर्थिकदृष्ट्या दुर्बल घटकांवर अतिरिक्त आर्थिक व मानसिक ताण टाकणे हे भारतीय संविधानाच्या अनुच्छेद 21 (जीवन व सन्मानाने जगण्याचा हक्क) याचा भंग करणारे आहे.
म्हणून खालील तातडीच्या मागण्या करण्यात येत आहेत :
उपजिल्हा रुग्णालय, दौंड येथील संबंधित कर्मचाऱ्यांची स्वतंत्र चौकशी समितीमार्फत तातडीने चौकशी करण्यात यावी.
दोषी आढळणाऱ्या कर्मचाऱ्यांवर शिस्तभंगात्मक व कायदेशीर कारवाई करण्यात यावी.
डिलिव्हरीसाठी आवश्यक असलेले सर्व साहित्य रुग्णालयाकडून मोफत व नियमित पुरवठ्याने उपलब्ध करून देण्यात यावे.
भविष्यात अशा प्रकारची पुनरावृत्ती होऊ नये यासाठी स्पष्ट शासन आदेश व माहिती फलक (Notice Board) रुग्णालय परिसरात लावण्यात यावेत.
गरीब व दुर्बल रुग्णांसोबत होणारे गैरवर्तन थांबवण्यासाठी तक्रार निवारण यंत्रणा प्रभावीपणे कार्यान्वित करण्यात यावी.
ही बाब अत्यंत तातडीची, गंभीर व सार्वजनिक हिताची असल्याने संबंधित वरिष्ठ अधिकाऱ्यांनी याची दखल घेऊन त्वरित योग्य ती कारवाई करावी, अशी जोरदार मागणी करण्यात येत आहे.

प्रेससाठी संपर्क :
नाव : अमर मधुकर जोगदंड
पत्ता : भीम नगर, सिद्धटेक रोड, दौंड, जि. पुणे
मोबाईल : 8888058805
ई-मेल : jogdand.amar1@gmail.com
दिनांक : 09/01/2026