ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਤੇ ਹਸਪਤਾਲ, ਫਰੀਦਕੋਟ ਵਲੋਂ ਵਿਸ਼ਵ ਖੂਨ ਦਾਨ ਦਿਵਸ ਮਨਾਇਆ ਗਿਆ...

ਫ਼ਰੀਦਕੋਟ, 21ਦਸੰਬਰ 2025( ਕੰਵਲ ਸਰਾਂ)ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਐਂਡ ਹਸਪਤਾਲ (ਜੀ.ਜੀ.ਐਸ.ਐੱਮ.ਸੀ.ਐਚ.), ਫ਼ਰੀਦਕੋਟ ਵਿੱਚ ਦੇ ਆਈ.ਐਚ.ਬੀ.ਟੀ. ਬਲੱਡ ਸੈਂਟਰ ਵੱਲੋਂ ਪੰਜਾਬ ਸਟੇਟ ਏਡਜ਼ ਕੰਟਰੋਲ ਸੋਸਾਇਟੀ (ਪੀ.ਐੱਸ.ਏ.ਸੀ.ਐੱਸ.) ਦੇ ਸਹਿਯੋਗ ਨਾਲ ਬਾਬਾ ਫਰੀਦ ਯੂਨੀਚਰਸਿਟੀ ਦੇ ਸੈਨੇਟ ਹਾਲ ਵਿਚ ਵਿਸ਼ਵ ਖੂਨ ਦਾਨ ਦਿਵਸ ਨੂੰ ਬੜੇ ਹੀ ਉਤਸ਼ਾਹ ਨਾਲ ਮਨਾਇਆ ਗਿਆ।
ਇਹ ਸਮਾਗਮ ਪ੍ਰੋ. (ਡਾ.) ਰਾਜੀਵ ਸੂਦ, ਵਾਈਸ ਚਾਂਸਲਰ, ਬਾਬਾ ਫਰੀਦ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਜ਼ (ਬੀ.ਐਫ਼.ਯੂ.ਐਚ.ਐੱਸ.), ਫ਼ਰੀਦਕੋਟ ਦੀ ਯੋਗ ਅਗਵਾਈ ਅਤੇ ਮਾਰਗਦਰਸ਼ਨ ਹੇਠ ਆਯੋਜਿਤ ਕੀਤਾ ਗਿਆ, ਜਿਨ੍ਹਾਂ ਦੇ ਲਗਾਤਾਰ ਸਹਿਯੋਗ ਨਾਲ ਸੰਸਥਾ ਵਿੱਚ ਸਵੈਛਿਕ ਖੂਨ ਦਾਨ ਸੇਵਾਵਾਂ ਨੂੰ ਮਜ਼ਬੂਤੀ ਮਿਲੀ ਹੈ।
ਇਸ ਮੌਕੇ ਸਰਦਾਰ ਗੁਰਦੀਤ ਸਿੰਘ ਸੇਖੋਂ, ਐਮ.ਐੱਲ.ਏ. ਫ਼ਰੀਦਕੋਟ, ਅਤੇ ਡਾ. ਸੁਨੀਤਾ ਭਗਤ, ਜਾਇੰਟ ਡਾਇਰੈਕਟਰ, ਪੀ.ਐੱਸ.ਏ.ਸੀ.ਐੱਸ. ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ।
ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਡਾ. ਨੀਤੂ ਕੁੱਕਰ, ਪ੍ਰੋਫੈਸਰ ਅਤੇ ਮੁਖੀ, ਆਈ.ਐਚ.ਬੀ.ਟੀ. ਵਿਭਾਗ, ਨੇ ਬਲੱਡ ਸੈਂਟਰ ਵਿੱਚ ਉਪਲਬਧ ਅਧੁਨਿਕ ਸਹੂਲਤਾਂ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਡੇਂਗੂ ਪੀੜਤ ਮਰੀਜ਼ਾਂ ਲਈ ਸਿੰਗਲ ਡੋਨਰ ਪਲੇਟਲੈਟਸ (ਐਸ.ਡੀ.ਪੀ./ਅਫੇਰੇਸਿਸ ਪਲੇਟਲੈਟਸ) ਮੁਫ਼ਤ ਪ੍ਰਦਾਨ ਕੀਤੇ ਜਾ ਰਹੇ ਹਨ, ਜੋ ਗੰਭੀਰ ਮਰੀਜ਼ਾਂ ਲਈ ਵੱਡੀ ਰਹਤ ਸਾਬਤ ਹੋ ਰਹੇ ਹਨ। ਫੈਕਲਟੀ ਮੈਂਬਰਾਂ ਡਾ. ਪਾਰੁਲ ਗਰਗ, ਡਾ. ਅੰਜਲੀ ਹੰਡਾ, ਡਾ. ਨਵਰੀਤ ਸਿੰਘ ਅਤੇ ਡਾ. ਸਿਮਰਨਜੀਤ ਕੌਰ ਨੇ ਸਵੈਛਿਕ ਖੂਨ ਦਾਨ ਦੀ ਮਹੱਤਤਾ ਬਾਰੇ ਜਾਗਰੂਕਤਾ ਫੈਲਾਉਂਦਿਆਂ ਲੋਕਾਂ ਨੂੰ ਇਸਨੂੰ ਨਿਯਮਤ ਸਮਾਜਿਕ ਜ਼ਿੰਮੇਵਾਰੀ ਵਜੋਂ ਅਪਣਾਉਣ ਲਈ ਪ੍ਰੇਰਿਤ ਕੀਤਾ।
ਨਰਸਿੰਗ ਸਿਸਟਰ ਨਰਿੰਦਰ ਅਤੇ ਕੌਂਸਲਰ ਵਿਜੇਤਾ ਨੇ ਸਵੈਛਿਕ ਖੂਨ ਦਾਨ ਕੈਂਪਾਂ ਦੀ ਸੁਚੱਜੀ ਯੋਜਨਾ, ਦਾਤਾ ਕੌਂਸਲਿੰਗ, ਸੁਰੱਖਿਆ ਮਾਪਦੰਡਾਂ ਅਤੇ ਸਮੁਦਾਇਕ ਭਾਗੀਦਾਰੀ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ।
ਇਸ ਸਮਾਗਮ ਦਾ ਉਦੇਸ਼ ਸਵੈਛਿਕ ਖੂਨ ਦਾਤਿਆਂ ਅਤੇ ਸਹਿਯੋਗੀ ਸੰਸਥਾਵਾਂ ਵੱਲੋਂ ਜੀਵਨ ਬਚਾਉਣ ਲਈ ਕੀਤੀਆਂ ਅਮੂਲ ਯੋਗਦਾਨਾਂ ਦੀ ਸਰਾਹਨਾ ਕਰਨਾ ਸੀ। ਇਸ ਮੌਕੇ 46 ਗੈਰ-ਸਰਕਾਰੀ ਸੰਸਥਾਵਾਂ (ਐਨ.ਜੀ.ਓਜ਼) ਨੂੰ ਥੈਲੇਸੀਮੀਆ, ਗਾਇਨਕੋਲੋਜੀ ਅਤੇ ਟ੍ਰੌਮਾ ਮਰੀਜ਼ਾਂ ਲਈ ਲਗਾਤਾਰ ਖੂਨ ਉਪਲਬਧ ਕਰਵਾਉਣ ਵਿੱਚ ਉਨ੍ਹਾਂ ਦੇ ਯੋਗਦਾਨ ਲਈ ਸਨਮਾਨਿਤ ਕੀਤਾ ਗਿਆ। ਇਸ ਤੋਂ ਇਲਾਵਾ, ਸ੍ਰੀ ਸਵਰਨ ਸਿੰਘ ਸੇਖੋਂ, ਸ੍ਰੀ ਸੁਰੇਸ਼ ਅਰੋੜਾ, ਸ੍ਰੀ ਭਲਿੰਦਰ ਸਿੰਘ, ਸ੍ਰੀ ਜਸਕੌਰ ਸਿੰਘ, ਸ੍ਰੀ ਦਲਜੀਤ ਸਿੰਘ, ਸ੍ਰੀ ਹਰਜੀਤ ਸਿੰਘ, ਸ੍ਰੀ ਅਸ਼ੋਕ ਕੁਮਾਰ ਭਟਨਾਗਰ, ਡਾ. ਬਲਜੀਤ ਕੁਮਾਰ, ਸ੍ਰੀ ਦਵਿੰਦਰ ਕੁਮਾਰ ਨੀਤੂ, ਸ੍ਰੀ ਗੁਰਜੀਤ ਸਿੰਘ, ਸ੍ਰੀ ਕੁਲਵੰਤ ਸਿੰਘ ਅਤੇ ਸ੍ਰੀ ਹਰਜੀਤ ਸਿੰਘ ਬਰਾੜ ਨੂੰ 100 ਤੋਂ ਵੱਧ ਵਾਰ ਖੂਨ ਦਾਨ ਕਰਨ ਲਈ ਵਿਸ਼ੇਸ਼ ਤੌਰ ’ਤੇ ਸਨਮਾਨਿਤ ਕੀਤਾ ਗਿਆ। ਉਨ੍ਹਾਂ ਦੀ ਨਿਸ਼ਕਾਮ ਸੇਵਾ ਮਨੁੱਖਤਾ ਅਤੇ ਜਨ ਸਿਹਤ ਪ੍ਰਤੀ ਉੱਚੀ ਜ਼ਿੰਮੇਵਾਰੀ ਦੀ ਪ੍ਰਤੀਕ ਹੈ। ਇਸ ਮੌਕੇ ਸ੍ਰੀਮਤੀ ਸੋਨੀਆ ਧਵਾਨ ਅਤੇ ਸ੍ਰੀਮਤੀ ਹਰਪ੍ਰੀਤ ਕੌਰ ਨੂੰ ਵੀ 25-25 ਵਾਰ ਖੂਨ ਦਾਨ ਕਰਨ ਲਈ ਸਨਮਾਨਿਤ ਕੀਤਾ ਗਿਆ, ਜਿਸ ਨਾਲ ਮਹਿਲਾਵਾਂ ਵਿੱਚ ਸਵੈਛਿਕ ਖੂਨ ਦਾਨ ਪ੍ਰਤੀ ਹੋਰ ਉਤਸ਼ਾਹ ਪੈਦਾ ਹੋਵੇਗਾ।
ਆਈ.ਐਚ.ਬੀ.ਟੀ. ਬਲੱਡ ਸੈਂਟਰ ਅਤੇ ਪੀ.ਐੱਸ.ਏ.ਸੀ.ਐੱਸ. ਦੇ ਵਕਤਾਵਾਂ ਨੇ ਖੂਨ ਦਾਨੀਆਂ ਅਤੇ ਐਨ.ਜੀ.ਓਜ਼ ਦੀ ਅਥਾਹ ਮੇਹਨਤ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਅਜਿਹਾ ਸਾਂਝਾ ਸਹਿਯੋਗ ਹੀ ਜ਼ਿੰਦਗੀਆਂ ਬਚਾਉਣ ਅਤੇ ਮਰੀਜ਼ਾਂ ਨੂੰ ਸਮੇਂ-ਸਿਰ ਇਲਾਜ ਮੁਹੱਈਆ ਕਰਵਾਉਣ ਲਈ ਬਹੁਤ ਜ਼ਰੂਰੀ ਹੈ। ਸਮਾਗਮ ਦਾ ਸਮਾਪਨ ਜਨਤਾ, ਵਿਸ਼ੇਸ਼ ਤੌਰ ’ਤੇ ਨੌਜਵਾਨਾਂ, ਨੂੰ ਸਵੈਛਿਕ ਖੂਨ ਦਾਨ ਨੂੰ ਨਿਯਮਤ ਸਮਾਜਿਕ ਫ਼ਰਜ਼ ਵਜੋਂ ਅਪਣਾਉਣ ਦੀ ਅਪੀਲ ਨਾਲ ਕੀਤਾ ਗਿਆ।