कर्तव्य बजावताना काळाचा घाला; गस्तीवर असलेल्या पोलीस अंमलदाराचा अपघाती मृत्यू

कर्जत तालुक्यातील राशीन परिसरात गुरुवारी रात्री गस्तीवर असताना झालेल्या भीषण रस्ते अपघातात अहिल्यानगर पोलिस दलात कार्यरत असलेले पोलीस अंमलदार सुदाम राजकुमार पोकळे (वय ३५) यांचा जागीच मृत्यू झाला.
कर्तव्य बजावत असतानाच अज्ञात वाहनाने जोरदार धडक दिल्याने हा अपघात झाला. धडक दिल्यानंतर वाहनचालक घटनास्थळावरून फरार झाला. अपघाताची तीव्रता इतकी होती की पोकळे यांचा घटनास्थळीच मृत्यू झाला.
या घटनेमुळे पोलिस दलात शोककळा पसरली असून, कर्तव्यावर असताना एका जवानाने प्राण गमावल्याने परिसरातून हळहळ व्यक्त केली जात आहे. फरार वाहनाचा शोध घेण्यासाठी पोलिसांनी तपासाची चक्रे वेगाने फिरवली आहेत.