కుర్రకారుని ఓ ఊపు ఊపేసిందీ ఘర్షణ సినిమా

వందల కోట్లతో తీస్తున్న ఇప్పటి సినిమాలు నెల ఆడటానికే ఆపసోపాలు పడుతున్న రోజులు ఇవి . తమిళం నుండి తెలుగుకు డబ్బింగ్ అయిన ఈ సినిమా (ఆ రోజుల్లోనే అనుకోండి) వంద రోజులు ఆడటమే కాదు ; కుర్రకారుని ఓ ఊపు ఊపేసిందీ ఘర్షణ సినిమా . ఒరిజినల్ తమిళ సినిమాకు కనక వర్షంతో పాటు , అవార్డుల వర్షం కూడా కురిసింది . డబ్ చేయబడిన మన తెలుగు సినిమా గురించి మాట్లాడుకుందాం .
ఈ సినిమా ఘన విజయానికి ఎవరిని మెచ్చుకోవాలో అని తేల్చటం కాస్త కష్టమే . ఒక వైపు కుర్ర జంటల రొమాన్స్ , ఇద్దరు కుర్ర హీరోల హూంకారాలు ఘీంకారాలు , మరో వైపు క్రైం ఏక్షన్ , ఫుల్ మసాలా , ఇన్నింటిని కలిపి కధను నేసి , ఒక్క నిమిషం కూడా ఊపిరి పీల్చుకోవటానికి టైం ఇవ్వకుండా తమిళనాడు ఎక్స్ప్రెస్ లాగా పరుగెత్తించిన దర్శకుడు మణిరత్నాన్ని పొగడాలా !?
లేక తమిళ ట్యూన్లకు ఖచ్చితంగా అతికే లిరిక్సుని , సూదుల్లాంటి పదునైన మాటల్ని వ్రాసి , ఆ పాటలు ఈరోజుకీ ఆనాటి కుర్రాళ్ళం అయిన నేటి నాలాంటి ముసలోళ్ళ నోట్లల్లో నానేలా వ్రాసిన రాజశ్రీ అని పిలవబడే విజయనగరం వాసి ఇందుకూరి రామ కృష్ణంరాజుని పొగడాలా !?
రాజశ్రీ లిరిక్సుకు అత్యంత శ్రావ్యమైన ట్యూన్లతో తెలుగు ప్రేక్షకులకు అందించిన ఇళయరాజాని పొగడాలా !? లేక వాటిని తమ మధుర గానంతో మసలి ముతక కుర్రకారు అందరినీ ఉర్రూతలూగించిన బాలసుబ్రమణ్యం , చిత్ర , వాణీ జయరాంలను పొగడాలా !?
అమల , నిరూషల చేత , జూనియర్ ఆర్టిస్టులు అయిన నాట్యకత్తెలతో సమకాలీన నృత్యాలను కంపోజ్ చేసిన డాన్స్ మాస్టర్ సుందరాన్ని పొగడాలా !? ఎవరిని పొగడాలో తేల్చటం కష్టమే . ఏ సినిమా అయినా ఓ కళాఖండం కావాలంటే , షడ్రసోపేతమైన విందు కావాలంటే అది గొప్ప దృశ్య , శ్రవణ కావ్యం కావాలి . 1988 లో వచ్చిన ఈ ఘర్షణ సినిమా అలాంటి షడ్రసోపేతమయిన విందే .
నటనపరంగా ప్రభు , కార్తీక్ బ్రహ్మాండంగా నటించారు. ఒకరంటే ఒకరికి పట్టరాని కోపం , ద్వేషం , చంపేయాలన్నంత కోపం . ఇద్దరి అమ్మలుగా జయచిత్ర , సుమిత్రలు షోడౌన్ లేని సపత్నులుగా ,పరిపక్వ నటనని ప్రదర్శించారు . ఇంక ఇద్దరి పత్నుల ఇష్టపతిగా , ఇద్దరు సవతి కొడుకుల తండ్రిగా , సీనియర్ ప్రభుత్వ అధికారిగా విజయకుమార్ బ్రహ్మాండంగా నటించారు . ఇద్దరి భార్యలకు , కొడుకులకు సమ న్యాయాన్ని అందించాలని తపన పడుతూ అందరి మధ్య నలిగిపోయే అమాయక ప్రాణిగా గొప్పగా నటించారు .
నిషా కళ్ళ నిరోషాకు మొదటి సినిమా . అల్లరి గోలతో అలరించిన అమల . చెల్లెలి పాత్రలో కొరియోగ్రాఫర్ తార (subject to correction) , కాసేపు తళుక్కుమనే పాత్రల్లో ప్రభుదేవా , డిస్కో శాంతి నటించారు . ప్రత్యేకంగా చెప్పుకోవలసిన మరో రెండు పాత్రలు ఉన్నాయి . పెళ్ళాం ఊరెళితే తాను , తన బాసూ కలిసి బ్లూపిలింలను చూసి తరించే పాత్రల్లో వి కె రామస్వామి , జనకరాజ్ . వీళ్ళిద్దరి బ్లూఫిల్మ్ కష్టాలు ప్రేక్షకులకు కావలసినంత హాస్యాన్ని అందిస్తాయి .
ఆరోజుల్లో ఒక్కో కాలేజి కుర్రాడు , కుర్రణి కనీసం నాలుగయిదు సార్లు చూసి ఉంటారు ఈ సినిమాను . అలా కనెక్ట్ అయ్యారు . అప్పటికింకా డ్రగ్స్ గోల లేదు . సిగరెట్లు తాగటమే రగస్యంగా . హాస్టళ్ళలో ఉండే అమ్మాయిలు రగస్యంగా సిగరెట్లు తాగే సాహసాన్ని చేస్తుండే వారు . అలాంటి ఓ సీన్ కూడా ఉంది . ఇలా ఈ సినిమా పేరు చెప్పగానే కుప్పలుకుప్పలుగా సీన్లు గుర్తుకు వచ్చేస్తుంటాయి . అంత మంచి సినిమా .
ఇంక పాటలు , డాన్సులు . ఎంత సేపయినా చెప్పుకోవచ్చు . రాజా రాజాధిరాజ రాజా అంటూ కార్తీక్ & కో పాట ఆరోజుల్లో పిక్నిక్కుల్లో , రోడ్ల కార్నర్లలో ఎక్కడ పడితే అక్కడ వేసారు . ఈ పాటలో ప్రభుదేవా తళుక్కుమంటాడు . ఒక బృందావనం సోయగం ఒక కోలాహలం కలకలం . నిజంగానే ఈ పాటలో కలకలం రేపుతుంది నిరోషా .
Most melodious beat నిను కోరి వర్ణం వర్ణం సరిసరి కలిసే నీ నయనం నయనం . షేడో ప్లేతో సాగుతుంది . అమల , ప్రభుల మీద ఈ డ్యూయెట్ . వారిద్దరి మీదనే మరో డ్యూయెట్ కురిసేను విరిజల్లులే ఒకటయ్యేను ఇరుచూపులే . కార్తీక్ , నిరోషాల మీద డ్యూయెట్ నీవే అమర స్వరమే సాగే శృతిని నేనే . జింలో ప్రభుని రెచ్చగొడుతూ మిత్ర బృందంతో హడావుడి చేసే పాట రోజాలో లేత వెన్నెలే రాజాకే తేనె విందులే .
. మా తరం వాళ్ళలో చూడని రుష్యశృంగులు ఉంటారని అనుకోను . ఎవరయినా అలా ఉంటే వెంటనే ఆస్వాదించండి . ఈతరం వాళ్ళయితే ఒకసారి చూస్తే మళ్ళా మళ్ళా చూసే లిస్టులో వేసేసుకుంటారు .
మనకు 1+2 హీరోహీరోయిన్ల సినిమాలు కుప్పలుకుప్పలు . ఇది కాస్త ఏవండోయ్ అవిడొచ్చింది ; కాస్త బలరామ కృష్ణులు లాగా ఉంటుందని అనుకోవచ్చు . ఇద్దరు , ముగ్గురు పెళ్ళాల ముద్దుల మొగుళ్ళకు అంకితం .