ପ୍ରଶାସନିକ ପଦାଧିକାରୀ ଗଣ ନିଜର ପଦମର୍ଯ୍ୟାଦାକୁ ବିପଦରେ ନପକାଇ ଜିଲ୍ଲାର ବିକାଶ ପାଇଁ ଚେଷ୍ଟା କରିବା ଉଚିତ୍।

କେନ୍ଦୁଝର ଜିଲ୍ଲା ତଥା ଜିଲ୍ଲା ମଧ୍ଯରେ ରହିଥିବା ବିଭିନ୍ନ ଉପଖଣ୍ଡିୟ ବରିଷ୍ଠ ପ୍ରଶାସନିକ ପଦାଧିକାରୀ ମହୋଦୟ ଙ୍କୁ ଏହି ସଚେତନ ବାର୍ତ୍ତା ପଠାଇ ସୁନିଶ୍ଚିତ କରୁଅଛି କି କିଛିଦିନ ପୂର୍ବରୁ ମାନ୍ୟବର ମୁଖ୍ୟମନ୍ତ୍ରୀ ଙ୍କର କେନ୍ଦୁଝର ସହରରେ ମଣ୍ଡୁଆ ଅଞ୍ଚଳରେ ଅବସ୍ଥିତ ଯେଉଁ ମୁଖ୍ୟମନ୍ତ୍ରୀ ଅଭିଯୋଗ ଶୁଣାଣି କାର୍ଯାଳୟ ରହିଛି। ସେଥିରେ ଯେଉଁ ମୁଖ୍ୟମନ୍ତ୍ରୀ ଙ୍କର ମୁଖ୍ଯ ଅଭିଯୋଗ ଶୁଣାଣି ଅଧିକାରୀ ଶ୍ରୀ ହିମାଂଶୁ ଶେଖର ସାହୁ ନିୟୋଜିତ ରହିଥିଲେ। ତାଙ୍କୁ ସ୍ବାସ୍ଥ୍ଯ ଗତ ସମସ୍ୟା କାରଣରୁ ତାଙ୍କର ପଦବୀରୁ ନିବୃତ୍ତ କରାଯାଇଛି। କିନ୍ତୁ ଏହା ତଥ୍ଯ ହୀନ ତଥା ଭିତ୍ତିହୀନ ଅଟେ, ଅର୍ଥାତ୍ ଶ୍ରୀ ହିମାଂଶୁ ଶେଖର ସାହୁଙ୍କର କୌଣସି ପ୍ରକାରର ସ୍ବାସ୍ଥ୍ୟଗତ ସମସ୍ୟା ଆଦୌ ନାହିଁ। ମୁଁ ବ୍ୟକ୍ତିଗତ ଭାବରେ ଅନୁସନ୍ଧାନ ଓ ଅନୁଧ୍ଯାନ କରି ଅବଗତ ହେଲି ଯେ, ଶ୍ରୀ ହିମାଂଶୁ ଶେଖର ସାହୁଙ୍କୁ ଆକ୍ରୋଶ ଓ ଈର୍ଷାନ୍ବିତ ହୋଇ ତାଙ୍କର ସ୍ବାସ୍ଥ୍ୟଗତ କାରଣ ଦର୍ଶାଇ ପଦଚ୍ଯୁତ କରାଯାଇଛି।

ମୋର ଜାଣିବାରେ ଶ୍ରୀ ହିମାଂଶୁ ଶେଖର ସାହୁ ଜଣେ ସ୍ବସ୍ଥ, କର୍ମଠ, ପରୋପକାରୀ, ଚରିତ୍ରବାନ, ସ୍ପଷ୍ଟବାଦୀ ଓ ନିସ୍ବାର୍ଥପର ସେବା ପ୍ରଦାନ କରୁଥିବା ବ୍ଯକ୍ତି ବିଶେଷ ଅଟନ୍ତି। ପ୍ରାୟତଃ ମୋର ଜାଣିବାରେ ୪୦ ବର୍ଷ ହେବ ଜଣେ ଭଲ ବ୍ଯକ୍ତି ବିଶେଷ ଅଟନ୍ତି। ତାଙ୍କର ପିତା ହାଇସ୍କୁଲ ଶିକ୍ଷକ ଥିଲେ, ମୁଁ ଜଣେ ତାଙ୍କ ପିତାଙ୍କ ପୁରାତନ ଛାତ୍ର ମଧ୍ଯରୁ ଅନ୍ୟତମ। କିନ୍ତୁ ଅତି ଦୁର୍ଭାଗ୍ଯର ବିଷୟ ମାନ୍ୟବର ମୁଖ୍ୟମନ୍ତ୍ରୀ ହଠାତ୍ ତାଙ୍କୁ ପଦଚ୍ଯୁତ କରିଦେଲେ। ଯଦିଓ ଏହା କୌଣସି ପ୍ରକାରର ସାମ୍ବିଧାନିକ ପଦାଧିକାରୀ ବୋଲି ବିବେଚିତ କରାନଯାଇ ପାରେ, ହେଲେ ନିଜ ନିଜର ରାଜନୈତିକ ଗୋଷ୍ଠୀ କନ୍ଦଳ, ବ୍ୟକ୍ତିଗତ ଭାବରେ ସ୍ବାର୍ଥ ହାସଲ କରିବା ପାଇଁ ଶ୍ରୀ ହିମାଂଶୁ ଶେଖର ସାହୁଙ୍କୁ ପଦଚ୍ଯୁତ କରାଯାଇଛି। ଏହା ପରେ ଉକ୍ତ ପଦାଧିକାରୀ କିଏ ହେବ ? ଏହାର କୌଣସି ପ୍ରକାରର ପ୍ରାମାଣିକ ତଥ୍ଯ ମୋର ହସ୍ତଗତ ହୋଇନାହିଁ। ବିଭିନ୍ନ ସୂତ୍ରରୁ ଜାଣିବା ପାଇଁ ମିଳୁଅଛି ଯେ ଶ୍ରୀ ହିମାଂଶୁ ଶେଖର ସାହୁଙ୍କୁ ପଦଚ୍ଯୁତ କରିଦେଲେ ଏବଂ ତାଙ୍କ ସ୍ଥାନରେ ଜଣେ ଚରିତ୍ରହୀନ ତଥା ଜମିବାଡି ଦଲାଲୀ କରୁଥିବା ବ୍ୟକ୍ତିଙ୍କୁ ନିଯୁକ୍ତି କରିବା ପାଇଁ ଯୋଜନା କରିଛନ୍ତି। ଏହାର ସତ୍ୟତା ଉକ୍ତ ପଦାଧିକାରୀ ସ୍ଥାନରେ ନିଯୁକ୍ତି କରିବା ପରେ ସ୍ପଷ୍ଟ ଜଣା ପଡିବ!

ମୁଁ, ଜଣେ ସାମାଜିକ କର୍ମୀ ତଥା ସମ୍ବାଦଦାତା ଓ ଏହି ଜିଲ୍ଲାର ନାଗରିକ ଭାବରେ ଅବଗତ କରିଦେଇଛି ଯେ, ଜିଲ୍ଲାର ଯେକୌଣସି ସରକାରୀ ବରିଷ୍ଠ ତଥା କନିଷ୍ଠ ବିଭିନ୍ନ ବିଭାଗର ପଦାଧିକାରୀ ଗଣ, କୌଣସି ପ୍ରକାରର ରାଜନୈତିକ ଦଳର ଚାପ ବଶବର୍ତ୍ତୀ ହୋଇ କାର୍ଯ୍ୟ କରିବା ଅନୁଚିତ ଅଟେ। ସମସ୍ତ ସରକାରୀ କର୍ମ ଗୁଡିକ ସାମ୍ବିଧାନିକ ପ୍ରକ୍ରିୟା ତଥା ସର୍ଭିସ ରୁଲ୍ ଓ ମାନୁଆଲ୍ ଅନୁସାରେ ନିର୍ବାହ କରିବା ଉଚିତ୍। ନଚେତ୍ ଯେକୌଣସି ପ୍ରକାରରେ କେବଳ ମୌଖିକ ବାର୍ତ୍ତା ପ୍ରତି ଗୁରୁତ୍ବପୂର୍ଣ୍ଣ ମନେକରି କର୍ମ କରିବା ଦ୍ବାରା ନିଜେ ନିଜର ପଦମର୍ଯ୍ୟାଦାକୁ ବିପଦରେ ପକାଇବା ଏବଂ ବଦନାମ ହେବାର ସମ୍ଭାବନା ଅଧିକ ରହିଛି। ତେଣୁ ଯେକୌଣସି ରାଜନୈତିକ ଦଳର ନେତୃବର୍ଗ ତଥା କର୍ମୀମାନଙ୍କ ଦ୍ବାରା ଯାହା କିଛି କର୍ମ କରିବା ନିତାନ୍ତ ଜରୁରୀ ରହିଛି, ସେସବୁ ଲିଖିତ ଭାବରେ ଅଭିଯୋଗ ଅଥବା ଚିଠି ରୂପରେ ପ୍ରଦାନ କରିବା ନିତାନ୍ତ ଆବଶ୍ଯକ ରହିଛି। ଶେଷରେ ଏତିକି ବିନମ୍ର ଅନୁରୋଧ ନିଜ ନିଜର ପଦମର୍ଯ୍ୟାଦାକୁ ସୁରକ୍ଷିତ ରଖିବା ପାଇଁ ଯତ୍ନବାନ୍ ହେବା ସହିତ ଜିଲ୍ଲାର ବିକାଶ କ୍ଷେତ୍ରରେ ନିଜ ନିଜର ପଦମର୍ଯ୍ୟାଦା, ବୁଦ୍ଧି ଓ ଦକ୍ଷତା ଅନୁସାରେ ବିବେକ ବିଚାର ଅନୁସାରେ ନିର୍ବାହ କରିବା ନିତାନ୍ତ ଆବଶ୍ଯକ।

ଏହି ସଚେତନ ବାର୍ତ୍ତା କୌଣସି ପ୍ରକାର ରାଜନୈତିକ ପ୍ରଣୋଦିତ କିମ୍ବା ଜିଲ୍ଲାର ବିଭିନ୍ନ ପ୍ରଶାସନିକ ପଦାଧିକାରୀ ମାନଙ୍କୁ ମିଥ୍ଯା ସୂଚନା ପ୍ରଦାନ କରି ଭୟଭୀତ କରିବା ପାଇଁ ଉଦିଷ୍ଟ ନୁହେଁ। ଯଦି ଉପରୋକ୍ତ ଉଲେଖ୍ଯ ସମସ୍ତ ବିଷୟ ମିଥ୍ଯା ଅଥବା ସରକାରଙ୍କ ବିଭିନ୍ନ ପ୍ରଶାସନିକ ପଦାଧିକାରୀ ମାନଙ୍କର କାର୍ଯ୍ୟଦକ୍ଷତା ପ୍ରତି ଅବମାନନା କରିବାକୁ ଉଦ୍ୟମ ଭଳି ମନେହୁଏ, ତେବେ ମୋ ବିରୁଦ୍ଧରେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ୍। ସେଥିପାଇଁ ମୁଁ, ସତ୍ଯକୁ ପ୍ରମାଣିତ କରିବା ପାଇଁ ପ୍ରସ୍ତୁତ ରହିଛି। ଉଦ୍ଦେଶ୍ଯ କେବଳ ଏତିକି ମୁଁ ଜଣେ ଏହି ଜିଲ୍ଲାର ନାଗରିକ ଭାବରେ ଆମ୍ଭର ସମସ୍ତ ପ୍ରଶାସନିକ ପଦାଧିକାରୀ ମାନଙ୍କର ପଦମର୍ଯ୍ୟାଦାକୁ ବିପଦରେ ନପକାଇ ଜିଲ୍ଲାର ବିକାଶ ପାଇଁ ଉପଯୁକ୍ତ ପଦକ୍ଷେପ ଗ୍ରହଣ କରିବା ପାଇଁ ବିନମ୍ର ଅନୁରୋଧ କରୁଅଛି।

ପୁରୁଷୋତ୍ତମ ପାତ୍ର, କେନ୍ଦୁଝର, ମୋବାଇଲ: ୮୪୫୬୦୫୨୮୭୬