कल्याण पश्चिमेकडील दुकानांना आज सकाळी आग लागली या आगीत विविध पक्षी,प्राणी आणि मासे मृत्यूमुखी पडले. रामबाग परिसर
कल्याण पश्चिमेकडील दुकानांना आज सकाळी आग लागली या आगीत विविध पक्षी,प्राणी आणि मासे मृत्यूमुखी पडले. रामबाग परिसरात ही घटना घडली.आगीचे कारण अद्याप समजू शकलेले नाही.
कल्याण पश्चिमेच्या रामबाग परिसरात दुकानांना भीषण आग लागली.या आगीमध्ये अनेक पक्षी,प्राणी आणि माशांचा मृत्यू झाला. विविध पक्षी,प्राणी आणि माशांच्या विक्रीचीच ही दुकाने होती.ही आग नेमकी कशामुळे लागली, याचे कारण मात्र समजू शकले नाही.कल्याण पश्चिम मुरबाड रोडवरून रामबाग परिसराकडे जाणाऱ्या मार्गावर पक्षी, ससे आणि मासे विक्रीची तीन दुकाने गेल्या अनेक वर्षांपासून आहेत.या दुकानांमध्ये लव्हबर्ड्स, कबुतरे,ससे आणि माशांची विक्री केली जायची.आज सकाळी साडेआठ वाजताच्या सुमारास या दुकानांना आग लागली.याची माहिती कल्याण-डोंबिवली महापालिकेच्या अग्निशमन दलाला देण्यात आली.अग्निशमन दलाचे कर्मचारी येईपर्यंत स्थानिकांनी धाव घेऊन ही आग आटोक्यात आणण्याचे प्रयत्न केले. मात्र या आगीने अवघ्या काही मिनिटांतच रौद्ररूप धारण केल्याने दुकानातील अनेक पक्षी,ससे आणि माशांचा होरपळून मृत्यू झाला तर घटनास्थळी पोहोचून अग्निशमन दलाने तातडीने आगीवर नियंत्रण मिळवले. काही पक्षी,ससे,माशांना जीवदान दिले.
ही आग नेमकी कशामुळे लागली,याबाबत ठोस कारण समजू शकलेले नाही.मात्र ही आग शॉर्टसर्किटमुळे लागल्याचा प्राथमिक अंदाज अग्निशमन अधिकारी विनायक लोखंडे यांनी व्यक्त केला.
